Home Llywodraethu Gwasanaethau Academi Anheddau Gweithio i ni Cysylltwch â ni
Do you have any questions or comments about what we do? A oes gennych unrhyw gwestiynau neu sylwadau am yr hyn rydym yn ei wneud?
Pwrpas Dysgu a Datblygu yn Anheddau yw sicrhau bod ein staff i gyd yn meddu ar yr wybodaeth, y sgiliau a’r cymwysterau angenrheidiol er mwyn darparu cefnogaeth o’r ansawdd gorau a bod y gefnogaeth honno’n cael ei darparu yn unol â’r gofynion rheoleiddiol a threfniadaethol.
Mae Anheddau wedi ymrwymo i barhau i godi safonau yn y dulliau cefnogi. Mae Dysgu a Datblygu effeithiol yn un o gonglfeini’r gwaith yma, ac mae’n rhan hollbwysig o gyflawni hyn a’n nodau strategol.
Mae gwerthoedd Anheddau yn seiliedig ar y gred fod staff yn allweddol i wasanaeth o safon ac mai ei weithwyr yw ei ased pwysicaf.
Mae hyn wedi’i ymgorffori yn y cyfleoedd dysgu sydd ar gael i bawb, i alluogi’r gweithwyr i ddatblygu mewn modd proffesiynol a phersonol.
Mae agwedd gyffredinol Academi Anheddau tuag at Ddysgu a Datblygu yn seiliedig ar y fframwaith rheoleiddiol a’r arferion gorau mewn gofal cymdeithasol a hyfforddiant. Cafodd ei datblygu er mwyn canolbwyntio ar y berthynas rhwng beth mae’r staff yn ei ddysgu a beth yw’r canlyniadau unigol i’r bobl sy’n defnyddio gwasanaethau Anheddau.
Mae tri phrif lwybr dysgu a datblygu i sicrhau bod y staff yn cael eu hyfforddi ymhob agwedd ar eu swydd a’u bod yn parhau i sicrhau datblygiad proffesiynol parhaus ar ôl yr hyfforddiant cychwynnol.
Y rhain yw’r Hyfforddiant Craidd/Gorfodol, Hyfforddiant Pwrpasol a’r cyfle i ennill cymhwyster achrededig fel yr argymhellir gan Gofal Cymdeithasol Cymru yn unol â’r Safonau Galwedigaethol Cenedlaethol.
Mae gwelliant parhaus yn ganolog i’n polisi dysgu. Bydd pob gweithiwr yn dechrau ar daith gydag Anheddau, a bydd y daith honno’n gymysgedd o hyfforddiant gorfodol, hyfforddiant sy’n seiliedig ar gynlluniau gofal, a chymwysterau galwedigaethol sy’n addas ar gyfer y swydd. Caiff gweithwyr eu hannog i fod yn gyfrifol am eu datblygiad proffesiynol parhaus eu hunain, ac i weithio i ddatblygu eu dulliau ymarfer yn unol â Chod Ymarfer Proffesiynol Gofal Cymdeithasol Cymru ar gyfer Gweithwyr Gofal Cymdeithasol.
Mae Anheddau yn cydnabod gwerth cymwysterau galwedigaethol wrth gefnogi datblygiad y gweithlu, ac mae ganddo ei Ganolfan Achredu ei hun.
Mae Canolfan Asesu Cymwysterau Anheddau wedi cael ei hachredu gan Sefydliad Dyfarnu CBAC / City & Guilds. Mae’n gyfrifol am asesiadau sy’n arwain at achredu sgiliau a gwybodaeth yn y gweithlu, ac mae ganddi ei thîm ei hun o aseswyr a dilyswyr cymwys.
Mae hyn yn sicrhau bod gweithwyr yn cael eu cefnogi’n fewnol gan aseswyr a hyfforddwyr cymwys er mwyn bod yn barod ar gyfer cofrestriad cychwynnol gyda Gofal Cymdeithasol Cymru. Wrth i daith y dysgwyr fynd yn ei blaen, mae’r ganolfan hefyd yn helpu’r staff i gael y cymwysterau angenrheidiol a’r cyfleoedd dysgu er mwyn gallu ailgofrestru.
Mae Dysgu a Datblygu yn Anheddau wedi’i ddylunio i gydymffurfio â rheoleiddwyr, ond mae ganddo gysylltiad cryf hefyd ag anghenion yr unigolion a gefnogir gennym.
Mae ein Tîm Parch mewnol wedi’u hyfforddi a’u hachredu gan NAViGO ac mae pob un wedi llofnodi addewid y ‘Restraint Reduction Network’.